Өлеңдер ✍️

Аспанды құстар шу қылып,

Арықтан асау су жүріп,

Қара жер қармен қоштасып,

Жылады жасқа булығып.

Сансыз жылға – сан арман.

От ұшып көлден –

Жанардан,

Күн ысып, алтын кірпігі

Қырқаны құшып қадалған.

Қадалып қырға,

Жер шалған

Үміт күтеді ел шамнан.

Ерекше көктем көңілді

Қаһарлы қыстан енші алған.

Ұлдардың күлкі жүзінде –

Бәрі қыздардың ізінде.

Бұтаға ілініп тамшы тұр,

Мөп-мөлдір әлде жүзім бе?!

Күн нұры түскен шағында

Оранды ол алтын жалынға.

Жарқылдап, жанып гауһардай,

Айналды асыл лағылға...

Жанарың өпкен шағында

Осындай менің жаным да!