Өлеңдер ✍️

Сыйынсақ та Жаратқанға,
Құтылдық па тас құдайдан?
Адам қылып жаратқанда
Қарауылды қасқа қойған.
Іздесеңіз теңеу сіздер,
Ескерткіштер – ел есінде.
Тас мүсіннің елеусіздеу
Торғай отыр төбесінде.
Ат шығарып, атақ іздеп,
Орнатсақ та ескерткішті,
Тасқа айналған пенде кез кеп,
Тұрғаны да жиіркенішті.
Кісі көп пе келбетінде
Иман тұрса, басқаны ойлар.
Қаптап кеткен жер бетінде
Астамсынған тас құдайлар.
Көп тұра ма жерге қонып,
Ашылмайды сыры қалай?
Сынар бір күн быт-шыт болып,
Жамап қойған құмырадай.