Тақпақтар ✍️

Бір музыка мектебінің
Ауласында – биік емен.
Шәкірттердің төккен күйін
Тыңдай-тыңдай ұйып емен.
Бір кезде ұшып бұлбұл келді,
Бұтағына қонды еменнің.
Іштен бір күй күмбірледі,
Жан сезімін тербеген кім?..
 Бұлбұл бір сәт құлақ түріп,
Құйқылжытып сайрап кетті.
Сосын тоқтап, тыңдап тұрып,
Қайта өнерін жайлап төкті.
Орындалған әсем небір
Әндерден де қалмай енді,
Кенелді ме әсерге бір,
Бір тыңдап, бір сайрай берді.
Жас ұрпаққа өмір әнін
Үйретпесе, көктеп пе өмір?
Не оқушы, не мұғалім
Болсам дей ме мектепке бұл?..
Салыстырман тұстасымен,
Мұны дана санаймын мен.
Әйтпесе бұл құс басымен
Саз мектебін қалай білген?..