Өлеңдер ✍️

Біз екеуміз ұқсаймыз ә?
Ұқсаймыз!
Жанқамақта күнелтеміз,
Қыстаймыз...
Аспан жақты аңсаймыз кеп ауырып,
Бірақ неге ұшпаймыз?
Сол аспаннан бір сәт күдер үзбедік,
Түсініксіз бірдеңені іздедік.
Тұңғиыққа телміріп те көргенбіз,
Бірақ, бірге жүзбедік.
Ойдан өзі жасап алып ұстаным,
Қойған қамап құс-жанын,
Мына әлем бір сәт мүлгіп кеткенде,
Қанатыңды тауып алып, Ұш жаным!
Шақырады паң кеуделі асыл күн,
Асыл күнге бас ұрдым.
Қанатыңды қай қиырға жасырдың?
Ұшып бірге өтейік,
Төбесінен мынау шулы ғасырдың!