Қазақша бата - тілек: Жарамазан [жарапазан]

Қонақтасын берекет,
Қаша берсін пәлекет.
Қиын дейді қиямет,
Жақын дейді ақырет.
Ақыретке барғанда,
Қыл көпірден аман өт!

Міне, бата, ақ ниет,
Бола берсін берекет.
Қиын дейді қиямет,
Жақын дейді ақырет,
Құлшылық қыл Аллаға,
Қыл көпірден таймай өт.
Кірсін дәулет,
Шықсын бейнет.
Алла атымен бейнет ет.
Жоқ-жітікке рақым ет.
Тәңір сені қолдасын,
Уайым-қайғы болмасын.
Қабыл болсын оразаң,
Әулетіңді оңдасын!

Айтамын жарамазан есігіңе,
Қошқардай қос ұл берсін бесігіңе!
Қошқардай қос ұл берсе бесігіңе
Кім келіп, кім кетпейді есігіңе?

Айтамын жарамазан ойлай-ойлай,
Қарынбай кеткен екен малға тоймай.
Отыз күн оразаға бір мал соймай,
Барады әлі кетіп бойлай-бойлай.

Айтқанда жарамазан тоямыз ба?
Кәдесін бұрынғының қоямыз ба?
Қой берсең, қозы берсең жарасады,
Апарып ауызашарға соямызда.

Ақ тауық, қызыл тауық құрман шашар,
Осы үйде бір жеңгем бар теңге шашар.
Теңгеңді шашпай төкпей қолыма бер,
Әйтпесе, Балтабай* бар ала қашар.

Меккеде бір ағаш бар басы күйген,
Жайқалып жапырағы жерге тиген.
Осы үйде бір адам бар құдай сүйген,
Ол адамның сауабы жұртқа тиген.