Өлеңдер ✍️

Түсімде,
Күллі күрсіністердің ішінде,
Құснихат жазып құлазып отыр екенмін.
Құсаға күпті пішінде.
Түсімде,
Тілім қыршылып тісімде,
Түлен түрткі боп түркіден қалған
түгелім, өртеніп жатыр ішімде.
Түсімде,
Мейлі, сен түсін, түсінбе,
Тас-құдайларға табынып мына пенделер
Айналып жатыр мүсінге.
Түсімде,
Тас-қалалардың ішінде,
Бір уыс топырақ таба алмай жүрмін
сандалып,
Ауа да су да у да жоқ ұрттап ішуге.
Түсімде,
Санамның əмірі жүрмейтін əлем ішінде,
Зар-мұңымды айтып, зау көкке самғап
кетіппін
Тəңірім, жерге түсірме!