Әңгімелер ✍️

- Біз саған қанша рет айттық, - деді директор балаға. - Сен бұл түріңмен бір күні заңды бұзасың ғой.

Заң деген сөзді ойлауы мұң екен, директордың көз алдына ішкі істер бөлімінің қызметкерлері келіп тұра қалды: "Осы солар да бала тәрбиесімен айналыспаушы ма еді?"

Директор ішкі істер бөліміне келді.

"Осылай да осылай, - дейді директор ішкі істер бөлімі қызметкерлеріне. - Баланы бірлесіп тәрбиелесек қайтеді?"

Келісті. Есепке алып қойды.

Сол-ақ екен, директордың төбесіне бұлт үйірілді.

Кабинеттерде баяндамалар жасалатын. Сол баяндамаларда мектептің аты аталады:

"Мына мектептің педагогтері жұмыс істеп отырған жоқ. Балалары есепте тұр".

Директор өз қолымен не бүлдіргенін енді ұқты.

Салып-ұрып ішкі істер бөліміне келді.

"Осылай да осылай, - дейді директор. - Іс насырға шабайын деді".

Түсінді. Шығарып берді.

Кабинеттерде баяндамалар жасалатын. Сол баяндамаларда мектептің аты аталады:

"Мына мектептің педагогтері жұмыс істей бастады. Балалары есептен шықты".