Өлеңдер ✍️

Күннен де жарық, мейірлі анамның көзі,
Жаныма майдай жағады еркелеткені.
Анамдай мені уайымдап, жаны күйетін,
Таба алмаспын-ау адамды адал жүректі.

Анамның көзі бар менде,
Сол көзбен қарап әлемге.
Анамдай сүйем ғаламды,
Мейірім төгіп бар елге.
Бөлісем махаббатыммен,
Анамның сүтімен сіңген!


Жанарымыз да аумайды күлімдеп қалған,
Өнегем бар бойымда өзіңнен алған.
Әлдиіңменен қазақтың әнін үйреттің,
Сол әнімменен дәстүрді келемін жалғап.


Анамның көзі бар менде,
Ақылын жидым жүрекке.
Дәстүр-салт, өнеге-үлгі,
Көрсетем артқыға мен де.
Анамның ізімен жүріп,
Жалғаймын жолын мәңгіге!

Орамалын да анамның мұраға алғам,
Тектіліктің бір белгісі - ұят, ар, иман!
Ана көзімен қабылдап салт пен дәстүрді,
Қызыма мен де табыстап өтем жалғаннан!

Гүлмекен Қасенбай
27.08.2025
13:34