Өлеңдер ✍️

Сауыр, Сайхан сауырында

Кіндігімнің байлауы бар.

Тарбағатай бауырында

Бірлігімнің қаймағы бар.

Катоным мен Нарынымда

Қарағайлы аймағым бар.

Самал ескен Самарымда

Жазиралы жайлауым бар.

Арыстарым туып-өскен

Өскеменім жайсаң жерім.

Адал еңбек туын көштен

Қалдырмаған қайсар елім.

Таңғы арай нұрын сепкен

Таулы Үлбім - айбар елім.

Шеманайдың нуын кешкен

Абыздарым - жайдары елім.

Марқа, Күршім сағым тұнған

Мөлдірімен мақтанамын.

Сырлы жандар сағындырған

Алтайыма аттанамын.

Шабыттанып жалын жырдан

Ұланыммен шаттанамын.

Жаратылған алтын нұрдан

Шығысымнан бақ табамын.