Жамбыл Жабаев (Большевиктер тобына)

 Жамбыл Жабаев (Большевиктер тобына)

Гүмбірлетіп домбыра,
Алсам сені қолыма,
Пернелерге тіл бітіп,
Сөз нөсерін өрбітіп
Жыр құйылар ойыма.
Сөйлесем дос-жаранға
Жыр құйылмас заман ба?
Кек қаусырған Талғардай,
Шыңын бұлақ жарғандай,
Өлең шіркін лақылдап
Сыймай кетер бойыма.
Қалай сыйсын қара өлең,
Балқып ерид шаттықпен
Тоғысқанда тойыңа.
Мен ғана ма бұл келген,
Көк өрім тал күллі өрен
Еріп келді соңыма.
Ақ сақалды, бурыл шаш, —
Мен бастаған жыршы жас,
Құтты болсын айтамыз
Большевигім тобыңа!
(Қол шапалақтау).
Қазақстан атынан,
Топтарыңа шақырған
Қарт жырауың мен едім,
Жырым шолып ел ішін,
Елдің ұлы жеңісін,
Партиямның алдында
Айтайын деп кеп едім!
(Қол шапалақтау).
Осы топқа қарасам:
Айбынындай елімнің,
Қуатындай жерімнің,
Оза шауып жүлде алған,
Сталиннен үлгі алған,
Шын болаттан құйылған
Балғасындай өмірдің
Большевикті көремін!
Өміріме өнеге
Бак, орнатқан келеге,
Байтақ шалқар өрістен,
Мызғымайтын жеңіспен
Озат шыққан өнерім!
Білім десе білімін,
Түлік десе түлігін,
Мүлік десе мүлігін,
Өмір десе өмірін,
Темір десе темірін,
Көмір десе көмірін,
Алтын десе алтынын,
Тілегенін халқымның
Сый ғып тартты керегін.
(Қол шапалақтау).
Аңсаған елге су берді,
Шөл далалар гүлденді,
Дауысты ашып қарлыққан,
Бүгін өмір жаңартқан,
Халықтың сүйген өлеңін,
Майырылмас алмас заводтай,
Біздің осы өмірден
Алуан сұңқар ер шықты
Қауырсыны темірдей,
Нажағайдай жарқылдап,
Көктен жауған шартылдап
Жаңбырша оғы төгілген!
Тайсалмастан дұшпаннан,
Темірменен құрсанған
Жаудың інін жемірген,
Жауар күндей түнеріп,
Жорыққа жойқын үдеріп,
Қаулай өрген жерімнен
Батырлары елімнің,
Хасиетті жерімнің,
Жау бастырмайд шенінен.
Соның күшті тобында
Өлеңім — оқ қолымда
Мен де жаудан шегінбен!
(Қол шапалақтау).
О, большевик ерлерім!
Елге тұтқа өрнегім,
Hұp үстіне нұр құйып,
Бақытқа елді бөлеңдер!
Бақыттың асқар шыңына
Өрлей берсін өнерлі ел,
Білімге, күшке, іске ұста,
Бар әлемге боп нұсқа,
Өрлей берсін өрендер!
Мен үдермін бұдан да
Қуат беріп тұрғанда
Ұлы Сталин кемеңгер,
Үдеген сайын ұлы ісің,
Сендер үшін, ел үшін, —
Сарайымнан саңқылдап
Шығар талай өлеңдер.
Жаудан қайтпас қарт жүрек,
Мен де сіздей большевик,
Мені кәрі демеңдер!
(Ұзақ ду қол шапалақтау)

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» Биыл 1 сыныпқа өтініш қабылдау 1 сәуірде басталып, 2024 жылғы 31 тамызға дейін жалғасады.
» Жұмыссыз жастарға 1 миллион теңгеге дейінгі ҚАЙТЫМСЫЗ гранттар. Өтінім қабылдау басталды!
» 2024 жылы студенттердің стипендиясы қанша теңгеге өседі