Өлеңдер ✍️

Шаттықтан ішіп кетер ем,
О, масқара,
Ішуге жоқ мүмкіндік.
Ерте бастап, қалғам бүгін болдырып,
Кеш бастаған мына құрдас тұр мүңкіп.
Шара бар ма құдіретіне Тәңірдің:
Сенесің бе, бүрі кеткен тамырдың.
Қара жерден күнде басып жүретін,
Танауыма келеді исі қабірдің...
Немесе
Құсадан ішіп кетер ем,
Күні кеше мық шегедей мығым ек,
Болдық бүгін көтерем.
Ішпей-жемей отырады тасып қан,
Абдыраймын адамдайын асыққан.
Жүрек байғұс сәтте бұзып ырғағын,
Бозарып жүз, аумай қалам жасықтан...
Сонда маған не істеу керек, ағайын,
Мұң-шерімді кімге барып шағайын?!
Шат-шадыман қоғамыма ілеспей,
Айналама қалай ғана жағайын?..
Құса ғана тигені ме еншіме,
Шаттыққа мас егінші де, кенші де.
Капитализм қуанышын бөліспей,
Ішқұса боп қалыс қалсам, ренжіме..