Өлеңдер ✍️

Су-Жер елі – Шумер елі – Шу елі,
Сулы, нулы қонысқа бай Күн елі.
Су бар жерде тіршілік бар қайнаған,
Сардар болар, сүлей болар түлегі.
Мұқағали атажұрты – Қарасу,
Шахановтың шыққан жері – Қасқасу.
Асан ата түнеп кеткен құт мекен,
Мен туған жер – қасиетті Атасу.
Туған жерді тұғырым деп білемін,
Туған елді қыдырым деп білемін.
Өткенімен, бүгінімен жұртымның,
Ұштасады арман, мақсат, тілегім.
Атажұртты мият тұтып жүремін,
Ана десе алып ұшар жүрегім.
Саф ауасы, мөлдір суы ласталса,
Хақ тағала тапса деймін бір емін.
Қызметім де, мекенім де өзгерер,
Тамашалап талай жерді көз көрер.
Берер сертім – мерейіңді өсіріп,
Іс қылмаспын әз атыңа сөз келер.
Қонары – сай қаңбақ емен қуған жел,
Елін табар белін бекем буған ер.
Жалпақ жерді шарларым рас,
сонда да
Жүрегімнің түкпірінде – Туған жер!