Өлеңдер ✍️

Жаз жайлауда, алыс әлі қоңыр күз,
Тау ішінде... қоңыр үйде... қоңыр қыз.
Қымыз құйған сол қоңыр қыз болмаса
Қою түннің өзі қандай көңілсіз!
Сапырып қымыз,
Сабадан құйып,
Ұсынды маған
Саусағы тиіп
Кеткенде сездім,
Қолының ұшы
Тұр екен шіркін
От болып күйіп.
Соншалық неге
Ыстықсың бізге
Қойшының үйі
Тұғыры биік!
Таудағы қымыз
Таңдайға балдай,
Таңдағы қыздың
Талғамы қандай,
Кеттім-ау самғап
Қанатым талмай,
Келгенше қайтып
Тағатым қалмай!
Тұп-тұнық әлем
Жаныңды емдеп,
Тыныштық күйі
Сабырмен тербеп,
Тұрғанда ғажап
Дүние мынау
Тойымсыз пенде
Тағы не керек?!