Өлеңдер ✍️

Бірінші өлең
Күт деп мені айта алмаймын, түсін мені, сүйіктім,
Қанша ойымды алса да орап алда тұрған қызық күн.
Арамызда жатыр айлар өтпестей боп көрінген,
Жолдар жатыр таусылмастай шексіз-шетсіз керілген.
Сондықтан ба, көп кешікті сағынышты хаттарың,
Бақыты боп жүрсің бе әлде, аяулым-ау, басқаның?
Бөлістің бе басқаменен бал қызығын түндердің,
Өкпелеттім бе, әлде, өзім, білмедім мен, білмедім...
Қиын саған, түсінемін, арадағы жіпті үзу,
Одан қиын екі жылды күтуменен өткізу.
Қиын саған, түсінемін, жас өмірдің жайнаған
Екі жылын алыстағы бір солдатқа арнаған.
Сондықтан да, сүйіктім-ау, кінәламан мен сені,
Сені еске алам ауыр ойлар басқан кезде еңсені.
Сен құлпырып өскін, гүлім, төсінде алтын аймақтың,
Сағыныш боп қала бергін кеудесінде солдаттың.
Жылдар өтер, оралармын алтын аймақ төсіне,
Сол кездерде қиналма сен өткенді алып есіңе.
Қанша ауыр болса дағы сені мәңгі ұмыту,
Қош, аяулым, мүмкін емес бар өкпемді жібіту.
Екінші өлең
Келші, жаным, ұмытайық, ұмытайық өткенді,
Жабайықшы мәңгілікке мұңға болы беттерді.
Аз болған жоқ біздер үшін тағдырдың бар өкпегі,
Сорлы жүрек айрылысқан қанша азапты өткерді.
Томсармашы, сонша алыстан келдім ғой мен сағынып,
Кетсең де сен басқа адамның көгіне от боп жағылып.
Қайта ал мені құшағыңа, сүйдір ыстық ерніңнен,
Сорлы жүрек бұл бақыттан кетсін, мейлі, жарылып.
Жалға қайта үмітімді біржолата кесілген,
Ұмытамын бәрін мәңгі, бәрін саған кешірем.
Бір кездері жүрегімді жүзге бөліп кетіп ең,
Саған деген бар өкпемді шығарамын есімнен.
Кешір, құрбым, сенсіз тыныш таба алмады жас жаным,
Саған деген бар өкпемді тұңғиыққа тастадым.
Бақыт жайлы қиялдаушы ең бар дүниені ұмытып,
Таба алдың ба сол бақытты құшағынан басқаның?
Махаббатты алып өтіп долы дауыл өтінен,
Қолыңа әкеп табыс етем кең дүние шетінен.
Сенсің менің табынарым, тастай салма далаға,
Сен деп өткен жастығымның атынан мен өтінем.
Үшінші өлең
Хатыңды көп күттім
Күн сайын асығып.
Әр күннен әрбір түн
Сырымды жасырып.
«Сүйем» деп серт берген
Сүйгенім, не болды?
Қол тимей жүр ме екен,
Болдым ғой екіойлы.
Ұмыт деп мені әлде
Айтты ма басқалар?
Сенбегін, әлемде
Біздерге жоқ қамал.
Көңілге нұр себер
Махаббат гүлдерін
Солды деп жүрсе егер
Сенбеші, сүйгенім.
Сенбеші ешкімге,
Махаббат сөнбейді.
Мен сені мәңгіге
Ұмытқым келмейді.