Өлеңдер ✍️

Жаңғырықтың сенер ем қулығына,
Сен мені сүйем десең!
Мәңгілікті өрер ем бұрымыңа,
Сен мені сүйем десең!
Көктемнің билер ем күркіріне,
Сен мені сүйем десең!
Бұлттарды ілер ем кірпігіңе,
Сен мені сүйем десең!
Айналар ем маусымның самалына,
Сен мені сүйем десең!
Байлар ем тылсымды жанарыңа,
Сен мені сүйем десең!
Тұнар ем айнаның сынығына,
Сен мені сүйем десең!
Құлар ем аспанның тұнығына,
Сен мені сүйем десең!
Айналар ем тағдырдың өлеңіне,
Сен соған әмір етсең!
Айналар ма ең сен менің әлеміме,
Мен сені Тәңір етсем?!.