Өлеңдер ✍️

  07.07.2023
  102


Автор: Серікбай Оспанов

Сүйесің...

Сүйесің! –


Сырыңды ақтардың,


Кетті ғой тау мен тас гүлдеп.


Шарықтап көкке шаттандым,


Аспаннан әрі асқым кеп.


 


Мақпал түн жаптым арқаңа,


Құлағыңа Айды сырға ғып.


Жанарыңда тұр алқа да


Ай-сырғаңменен нұрланып.


 


Аспаннан әрі астым мен,


Аралап кеттім құс жолын.


Жұлдыздан шашу шаштым мен,


Шық болып жерге түсті оным.


 


Сүйгенің мені үшін де


Әпердім бұлақ-шолпыңды.


Өңім бе әлде түсім бе?


Еске аласың ба сол түнді?!


 


Күшім де, ерек ісім де,


Әлі күн жүрмін таң қалып.


...Қараңғы ойларым ішінде


Сол бір түн ерек жап-жарық!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу