Өлеңдер ✍️

Өмір – өзен адамға қарсы ағады,

Бола бермес жүректің аңсағаны.

Қапаланып біреулер қайғы шегіп,

Әләулайлап біреулер ән салады.

Өмір – уақыт,

Жеткізбес бұл арманың,

Алға сүйреп тірлікте тұрар бәрін.

Қаншама ұқтым десем де ұлылығын,

Мен әзірге шын сырын ұға алмадым.

Өмір – құйын,

Ұршықтай үйіреді,

Қара бұлт боп, ақ бұлт боп түйіледі.

Өмір – жұмбақ өтесің ойланумен,

Неткен, шіркін, шешуі қиын еді.

Өмір мазақ секілді айыптыға,

Өмір ғажап секілді байыптыға.

...Қызығы не жаяуға машина боп

Өмір өзен болса егер қайықтыға?!