Өлеңдер ✍️
Қырық бесінші жылы туғандар
«Қабырғасын күйреттім қатердің», – деп.
Мақтанушы ем, «Жеңісті әкелдім!» – деп.
– Жеңіс жылы қалайша туғансың сен? –
Деп сұрады бәз біреу: – Әкең кім?! – деп.
Жиі аламын осы бір күдікті еске,
Ойланбас па,
Ойын сәл ірікпес пе?!
Мүгедек боп әкесі оралғандар –
Туғандардың көбісі қырық бесте!
Жеңіс келді шадыман-шаттық алып,
Есіктерін әр үйдің қақты барып.
Біз келгенде өмірге
Ел қуанып,
Жауымыздың ордасы жатты жанып!
Еркін самғап қанатын қақты кептер,
Қайта көктеп өртенген жатты бөктер.
Дүниеге келгендер қырық бесте –
Аманаттар!
Армандар!
Ақ тілектер!
Жеңе білген жауларын кіл егесте,
Өшпейді аты Ерлердің,
Жүреді есте!
Дүниеге келгендер қырық бесте –
Қайта шыққан ертеңге гүл емес пе?
Өмірге кеп,
Ілестік күліп көшке,
Алдық жиі алапат бүлікті еске...
Көтерілген Рейхстаг төбесіне
Жалаулар ғой туғандар қырық бесте!
Әлеуметтік желілерде бөлісіңіз:
Facebook | VK | WhatsApp | Telegram | Twitter