Өлеңдер ✍️

Саған салмақ көп саламын, білем мен,

Бәрі-бәрі өзіңе кеп тірелген.

Қайдан сезсін өлшейтіндер өмірді

Ақшаменен,

Киімменен,

Кілеммен.

Ей, жүрегім, кім бар мәңгі қалатын,

Сен де өтесің әрі сәби, әрі ақын.

Сөзімен де,

Көзімен де

Көп саған

Қанжар қадап, ине сұғып алатын.

Саған ауыр болып жүр ме әр күнің,

Қиыны сол – ала алмайсың сәл тыным.

Басқалары жазылып та кетер-ау,

Ең ауыры – салған жара жақының!

Не естімейсің күйіп-піскен кейде елден,

Қажыдың-ау күнделікті күйбеңнен...

Сен сүйгеннен қатты соғып, жүрегім,

Сен тоқтарсың шын беріле сүйгеннен!