Өлеңдер ✍️

Төзуің керек

Көп керістерге, өтпелі істерге,

Жаның ауырып, өкпең іскенде, 

Тірліктегі көп тексерістерге, 

Көшедегі көп кептелістерге!

Төзуің керек 

Қыңыр өмірде қиындықтарға, 

Қара лашықты құйын жыққанда.

Қу кедейліктің күйін құшқанда, 

Бауырың қалса қиыр жұрттарда. 

Төзуің керек 

Ойлаған ісің қырсыға берсе, 

Жалғанның өмір ырқына көнсе, 

Асау арманың тұншыға берсе, 

Құлазып қалса сыңсыған өлке.

Төзуің керек, төзбесең өлдің,

Тағдырдың оғы көздесе, көндің. 

Талқаның барда талпынбай болмас, 

Біреуін тауып өзгеше жолдың.

Құдайды ойлаймыз құласақ қана,

Жамандық көріп жыласақ қана. 

Ең мықты әрі бақытты адам – 

Төзе білгендер рахатқа да, 

Төзе білгендер ұлы атаққа да.