Өлеңдер ✍️

Жасап жүрсің жырда сен арыстандық,
Арыстандық деуге оны – намыстандық?!
Тірілерден пенделік – күтеріміз,
Өлгендерден іздейміз данышпандық.
Шегесімен шындық – жыр шегенделдік,
Ақиқатты ақиқат деген де – ерлік!
Көрмеген боп, жұмамыз көзімізді
Қасымызда жүрсе де кемеңгерлік.
Ақиқаттың пердесін бердің ашып,
Жырыңды оқып жылайды шерлі ғашық.
Сені бірақ данышпан демейді ешкім –
Жүрмейтіндей данышпан жерді басып.
Ғайбаттайды сені әлі, дуылдайды,
Жырдан бірақ жүрегің суынбайды.
Бар жазығың – тірісің,
Өліп кетсең –
Ұлы ақын деп бәрі де шуылдайды.
Арқаңа сап бейнетін сан алыптың
Даланы ұққан көңілмен қаланы ұқтың.
Жұрт не десе, о десін!
Сен жүре бер
Жырын жазып мәңгі өлмес даналықтың!