Өлеңдер ✍️

⠀
Болсаң да көркі ғаламның,
Бір тамшы судан жаралдың.
Мүмкін періште шығарсың
Мен қарапайым адаммын.
⠀
Жанарың жанды баурапты,
Жымиып тұрып алдапты.
Үйрету үшін күресіп
Тағдырым сені таңдапты.
⠀
Үндемей жүріп тістейсің,
"Басыңды и!" - деп күштейсің.
Бағындыруды білмесем
Білгендеріңді істейсің.
⠀
Айқаса беріп бекерге,
Сенімен баққа жетем бе?
Әлемде жалғыз болсаң да
Кеудеңді көкке көтерме.
⠀
Көрсетіп қылық икемді,
Бағаласаңшы сүйгенді.
Басымды біраз ауырттың
Шаршаттың әбден жүйкемді.
⠀
Алыстан қолды бұлғайсың,
Дегендей түкке тұрмайсың.
Жүрекке жүкті салғанша
Таспенен неге ұрмайсың.
⠀
Сезімде қандай сақшы бар,
Жібермей жүрген кек шығар.
Сүймесең сүйме, ендеше
Келмесең келме, кетші бар.