Ауа және климаттық өзгерістер. Қазақ тілі, 7 сынып, презентация. 3 сабақ

Қызығушылықты ояту

«Допты ал, жауап бер»

Мұғалім ауа райы тақырыбына қатысты сөздердің біреуін айтып, кез келген оқушыға кішкене допты лақтырады. Допты қағып алған оқушы мұғалім айтқан сөздің мағынасын түсіндіріп, басқа бір сөзді айтады да, допты айналысындағы біреуіне лақтырады.

Бөлім атауы: Ауа райы және климаттық өзгерістер.

Сабақтың тақырыбы: Ауа райы болжамы

Оқу мақсаты:

7. О1 Ақпаратты түсіну

Мәтіндік және графиктік (кесте, диаграмма, сурет, шартты белгілер) ақпаратты интерпретациялау.

Сабақтың мақсаты:

Оқушылар кесте, диаграмма, сызба, шартты белгілер түрінде берілген ақпаратты түсіне алады.

Берілген ақпаратты қолдана отырып мәтін құрастырады.

Бағалау критерийі:

• қажетті ақпаратты анықтай алады;

• өмірмен байланыстыра алады.

Мағынаны тану сатысы

«Белсенді тапсырма»

Оқушылар тақта алдына шығып, табиғаттағы ауа райының түрлі құбылыстарын қимыл-қозғалысымен, дыбыстармен салады. Оны оқушылар сипаттап табуы керек. Келесі бір оқушы оның әрекетіне комментарий айтып, оны тағы басқаша қалай жеткізуге болатынын бейнелеп көрсетеді. Осылай бірнеше оқушы жасап жалғастырады. Соңында сәтті шыққан әрекеттерді іріктеп алады.

Жаңа сөздермен жұмыс

Қарлы жаңбыр – ерте көктемдегі және күздегі қар аралас жауын.

Нөсер – төгіп-төгіп жауып, тез аяқталатын будақ жаңбыр.

Соқыр жауын – күн көзі шығып тұрғанда жауатын ұсақ тамшылы өткінші.

Сіркіреме – өте ұсақ тамшы түрінде түсетін майда жауын.

Сел – қар мен мұздың еруінен нөмесе қатты нөсер салдарынан болатын су тасқыны.

Бұлт – судың жылу әсерінен аспанға көтеріліп, буға айналған түрі. Атмосферадағы өте ұсақ су тамшылары мен мұз түйіршіктерінің жиынтығы.

Ақша бұлт – ашық күнде аспанда қалқып жүретін түйдек-түйдек ақ бұлт.

Қара бұлт – түнерген қараңғы бұлт.

Көшпелі бұлт – көкжиектен саумалай көтеріліп, тез көшетін бұлт.

Сұр бұлт – аспанды жаппай торлап, төрт-бес шақырым биіктікте жүретін тұнжыр бұлт.

Оқылым тапсырмасы

Оқылым. Кесте, диаграмма, сызба, шартты белгілер түрінде берілген ақпаратты түсіну, қолдана білу

Үш топқа үш түрлі мәтін таратылып беріледі

1-топқа: Казгидромет орталығының ауа райы болжамы туралы.

2-топқа: 2017 ж. қаңтар айында күтілетін орташа айлық ауа температурасының мөлшерден ауытқуы.

3-топқа: 2017 ж. қаңтар айында күтілетін жауын-шашынның мөлшерден ауытқуы.

Тапсырма

1.Берілген ақпаратты түсініп оқып, өз сөздеріңізбен айтып беріңіздер.

2. Бұл мәтін екенін дәлелдеңіздер.

3. Мәтіннің тақырыбын, негізгі ойын анықтаңыздар.

4. Мәтіндегі тірек сөздерді теріп жазыңыз.

5. Тірек сөздерді қатыстырып, 3 жай сөйлем, 3 құрмалас сөйлем құрастырыңыздар.

Тапсырма барысы:

Оқушылар кесте, диаграмма, сызба, шартты белгілер түрінде берілген ақпаратты жеке қарастырады.

Жұпта әңгімелеу (әр оқушы бір-біріне белгілі бір уақыт көлемінде берілген ақпарат туралы әңгімелейді.)

Топтық жұмыс. Әркім мәтін мазмұны бойынша өз пікірлерін ортаға салады. Берілген ақпаратты қолдана отырып мәтін құрастырады.

4. Әр топ өз пікірлерін, іріктеп алған ойларын, қажетті ақпараттарын

сынып алдында қорғайды.

Бағалау парағы

Кері байланыс

«Плюс-минус-қызықты» әдісі