Наурыз мерекесі туралы Тақпақтар ✍️

Наурыз думан мереке, Әр көктемде келетін. Ұлттық ойын ойнатып, Сыйлықтарын беретін.

Наурыз келсе думанды, Түрлі ойындар болады. Наурыз көже ішеміз, Ұлттық тағам бағалы.

Наурыз ашты есігін, Жаңа жылды бейнелеп. Наурыз көже іштік біз, Әжемізге еркелеп.

Наурыз думан тамаша, Мерекеге бастайтын. Күн менен түн теңесіп, Жаңа жылды растайтын.

Наурыз келді мереке, Қуандырып біздерді. Жаңа жылмен қазақтың, Құттықтаймын сіздерді.

Кең алаңда  бала-шаға жиналып, Салт-дәстүрлі ойындардан сый алып. Наурыз келді төрімізге ағайын, Барша жанға қуанышты күй алып. Жібек Искакова

Наурыз көже беріліп жеті астан, Жиналған жұрт көңілді,  көңілді аспан. Қыз бен жігіт сырласып наурыз тойда, Бірін-бірі ұнатып көңіл қосқан. Жібек..

Ақ дастархан жайылып халық үшін, Дастарханнан дәм татып үлкен кішің. Наурыз келді төрімізге ағайын, Көңіл-күйдің беріп ең көңілдісін.  Жібек Искакова

Күніміз бен түніміз бұл теңеліп, Қазақ елі қуанышқа кенеліп. Наурыз келді төрімізге ағайын, Самал желмен жасыл-желек тербеліп. Жібек Искакова

Киіз үйлер тігіліп әр қанаттан, Нұрын төгіп көкжиектен таң атқан. Наурыз келді төрімізге ағайын, Жар боп бізге қолдаушымыз Жаратқан. Жібек Искакова

Қыс — кәрілік,  болса көктем — жастығым, Жастығымдай күлімсіреп ашты күн. Наурыз келді төрімізге ағайын, Жылдың басы,  біздер үшін басты күн.  Жібек..

Бар жылулық,  күннен шуақ таралып, Табиғатым жер анадан нәр алып. Наурыз келді төрімізге ағайын, Гүл көктемде бар айнала жаңарып. Жібек Искакова

1) Наурыз келдіНаурыз келді қуантып, Жанды баурап гүл көктем. Жылдың басы қазақтың, Айналаны гүлді еткен.2) Жыл басы НаурызЖылдың басы Әз-Наурыз..

Құтты болып Наурызым, Уайым-қайғы жоқ болсын! Ұлыс оң боп, ақ мол боп, Көңіліміз тоқ болсын!

Жаңа жылым, Наурызда, Атты сәтті таң күліп. Бар айнала жанданып, Құлпыруда жаңаша.

Көктемменен бір келген, Наурыз тойы тамаша. Табиғатым оянып, Құлпыруда жаңаша.

Наурыз, жаңа жылымда, Бақ сыйласын жаңа күн. Арайлы таң нұр сыйлап, Күлімдесін күн мен түн.

Наурыз келді халайық, Құтты болсын мереке. Мерекеде жандана, Арта берсін береке.

Ұлыстың ұлы күнінде, Көңіліміз жандансын. Бақ-береке орналып, Бар жақсылық таңдалсын.

Қазақтың наурыз тойында, Қуаныштар көп болсын. Ақ тілектер айтылып, Көңіліміз тоқ болсын!

Наурыздың бұл тойында, Көңілді күй тербеді. Жылдың басы жаңа жыл, Жарқынды сәт, күй берді.  

Наурыз келді ағайын, Жұлдыздайын жанайық. Ұлыстың ұлы күнінде, Әсем әнге салайық.

Ұлыстың ұлы күнінде, Бақ-береке орнасын. Шаттық келіп жеріме, Қуаныштар жалғансын. 

Хош келіпсің, Наурызым, Нұрға бөлеп елімді. Шаттығыңды бере бер, Қуандырып жерімді.

Құтты болсын, қазағым, Наурыз жаңа жылың бұл. Қуанышпен тербесін, Енген жаңа күнің бұл.