Өлеңдер ✍️

Жүрекке әкеп
Сағыныш дертін жамайтын,
Өтті ғой, міне,
Күрсініспенен талай күн...
Отты ұшқын шашқан
Жанарың қайда?
Сағындым...
Шуаққа бөлеп,
Күлімдеп дәйім қарайтын...
Келді ғой көктем
Құлпыртып гүлзар бағымды,
Алма ағаштары
Ақ бантик гүлін тағынды.
Көктемдей жайсаң
Мінезің қайда?
Сағындым...
Таң самалындай
Қытықтап өтер жанымды.
Жалқындап жанып
Ұшқындап тұрған алау ем,
Лапылдап жанбай
Қалайша өшіп қалам мен?!
Тәтті әнің қайда?
Көңілім қалды құлазып,
Естілмей көптен
Құлаққа таныс сол әуен...
Елестен өзге
Сенен еш белгі қалмапты,
Әніңді аңсап
Ұзақ түн кездім бау-бақты.
Көп араладым,
Өзіңді іздеп дамылсыз,
Бірақ та, әттең,
Сезімім мені алдапты...