Өлеңдер ✍️

Ашуланып қайттың неге, ерке гүл?
Мектебіңе кетіп едің ерте бір.
Тортаңдайсың ата жауың сияқты
Бантигіңді шешіп кеткен тентек ұл.
Қыз баланың бұрым деген сәні еді,
Болады оның әлі талай «әлегі».
Қыз бұрымға маза бермей жүретін
Балалықтың ойыны бар әдемі.
Бұрым – бұлақ таудан ақын құлатқан,
Бұрым – арман, қол жетпеген ұнатқан.
Момақан боп жүрген бүгін әкең де
Талай қызды шаштан тартып жылатқан.
Ашуланба, ол бір ойын талайғы,
Адамдардан әр ұрпаққа тарайды.
Ақылды бол, сол бұрымның бір талы
Тентектерді құрықтауға жарайды.