Өлеңдер ✍️

Тәнді өртенген ақ жаңбырмен мұздаттық,
жүректерді сағынышпен сыздаттық.
Ақ бұлттардан басқа ару, сұлу жоқ,
тау басында,
қар қасында біз жаттық.
Көп–көп ойлар түйдектеліп, топ болып,
көкіректе қарадай кеп шоқ болып,
Қарағаймын бірге жанып қара үйде,
шаңырақтан ұшып жаттық от болып.
Алқындырып алау бойда асқанда,
солай-солай тарап жаттық аспанға.
Көп жарыққа кеттік біздер қосылып,
түнгі аспан жұлдыздарын шашқанда.
Тұрдық солай түнгі аспанда өрт болып,
кеудемізге шаттық толып, дерт толып,
Алыс қалған Алматыны, сені ойлап,
көрсек деген көздеріміз төрт болып..