Өлеңдер ✍️
Өлеңдер ✍️
09.05.2021
176
Жүріп келе жатырмын
Жыл жарым болып барады.
Шыққаныма шығыстан,
Қоштасқалы бас иіп
Алатаумен туысқан.
Күнде жүріс, күнде ұрыс
Батысқа кетіп барамын.
Жағаласып жауменен
Алысып кетіп барамын.
Өлім кешіп, қан кешіп
Кетіп бара жатырмын.
Туын ұстай елімнің
Қауіпті кезең жерлерден,
Өтіп бара жатырмын.
Тағдырың үшін, о, елім,
Тағы жүрем, тағы да...
Ер кеудесін оқ алмас
Аттанған ел арына.
Ер өлмек емес ешқашан
Қол созған ел зарына,
Ер қайыспас ешқашан
Қол жуған жау қанына.
О, Алатау, о, Арқа!
Сендерден туған ұл едім,
Сендерсің менің қуатым,
Сендерсің белім, тірегім!
Ерегісте, ұрыста
Қайыспастай туған ер,
Жеңілмейтін жеңетін.
О, Алатау, қуат бер!
О, Алатау, қуат бер!
Балаңа шапқан жауыңа,
Майдан жолы қиын жол,
Тағы да жүрем, тағы да...
Әлеуметтік желілерде бөлісіңіз:
Facebook | VK | WhatsApp | Telegram | Twitter