👈 қаріп өлшемі 👉

  Өлеңдер ✍️

  30.03.2021
  216


Автор: Саят Әбенов

ӘКЕМЕ

Ойланып кеттім ағарған шашын көрдім де,
Балалықпенен байқамаппын-ау мен мүлде...
Өмірге сонда жастығын ұрлап жүзінің,
Қап-қара шашын ағарту үшін келдім бе?

Қиналар іштей өзімен өзі күрсініп,
Қажытты білем бітпейтін күйбең тіршілік.
Мен жаққа кейде үмітпен қарап қояды,
Өскенде жеміс жегізер ме - деп бұл шыбық.

Ер жеттім, Әке, сенімің енді ақталар,
Балаңмын түбі əкелік міндет атқарар.
Бүгінгі уайым, бүгінгі қайғың болған ұл,
Бір күні сенің басыңа қонған бақ болар.

Өмірде мынау өзіңсіз жалғыз тірегім,
Шытсаң да қабақ көңілің жылы білемін.
Бақытты жанмын, себебі, сендей әкем бар,
Сен болсаң əке - əкесіз қалған ұл едің.

Түсінем бəрін асқар тау болу оңай ма,
Мұң кешіп талай шомылдың үнсіз көп ойға.
Ақылың - айна бойымды түзеп тұратын,
Қайтемін, əке, шаң басып қалса сол айна?


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы