Өлеңдер ✍️

Думанды күн шақырды,

Бар ағайын, жақынды.

Азан айтып қуанып,

Әкем қойған атынды.

Мен үшін жыр – гүлсің деп,

Жарық сәулем күнсің деп.

Нұрайым деп атады,     2- рет

Нұрға бөлеп тұрсын деп.

«Айым тусын оңынан»,

Бата-тілек  ағылды.

Ниет тілеп жолыңа,

Тәңір берсін бағыңды.

Екі етпеген сөзіңді,

Еркелетті өзіңді.

Дархандығы әкемнің,    2- рет

Мейірінен сезілді.

Артта қалып балалық,

Уақытпенен жаңарып.

Көз жүгірттің алысқа,

Бой жеткен қыз саналып.

Көптен биік өрең де,

Жақынсың жыр – өлеңге.

Қазағымның мұңды үнін,   2- рет

Жырлайтұғын тереңнен.

Білетін шын өз ісін,

Қиял жүйрік өзісің.

Бауырмалдық бойыңда,

Анамның дәл көзісің.

Талай қамал алатын,

Ақынға тән бар атың.

Өмір деген ізденіс,      2- рет

Талмасын еш қанатың.

Еңбегің көп елеулі,

Бақытқа жет кемелді.

Асқақтасын мерейің,   2- рет

Өрге сүйреп кемеңді!

Айтбек Рымбекұлы Әліпов, Астана, маусым 2024ж.