Тақпақтар ✍️

Бірде Дауыл кинодан
Корриданы
 көрген-ді.
Ұнап қалып бұл оған,
Көк бұқаға келді енді.
 
Алаулатып шұғасын,
Әрі-бері бұлғады.
Кере жазып құлашын,
«Келсеңші!» деп ымдады.
Түк те кірмей басына,
Бұқа тұрды аң-таң қап.
Дауыл енді қасына
Жақындады талтаңдап.
Мүйізінің біреуін
Тартып қалды шегініп.
Көк бұқаға бұл ойын
Кетті қызық көрініп.
Іші пысып күн ұзын
Тұрса,
Аясын бұл кімді?
Ежірейіп,
Мүйізін
Төсеп,
Алға ұмтылды.
Ойынға әлде қанды ма,
Мойнын ішке тығып ап,
Дауыл түсіп алдына
Бара жатыр зымырап.