Өлеңдер ✍️

Ойламайсың ештеңе,

Сен ұқпайсың папаңды.

Сен – сәбисің кішкене,

Мен – сәбимін сақалды.

Сен жайлы жыр ойымда,

Тағы жазғым келеді.

Сен тоймайсың ойынға,

Тек ойыншық керегі.

Қулығы жоқ «түлкің» бар,

Қорықпайды «қояның».

Сенің маған күлкің – нәр,

Мен күлкіге тоямын.

Сықылықтап күлесің,

Дейсің маған:

– Күлмейсің!

«Папа» деуді білесің,

Мәнін бірақ білмейсің.

Мініп алып арқама,

Дейсің маған:

– Таудайсың!

Мен ұқсағам папама,

Сен өзімнен аумайсың!

Балапансың ұяда,

Мен тынымсыз торғаймын.

Қиыл кетті қияға –

Ертеңіңді ойлаймын.

Күліп күнде күнімдей,

Өс, қалқашым, жыламай.

Жүрсең деймін сүрінбей,

Сүрінсең де құламай!

Өссе деймін өркені,

Түсіп ойға борышым.

– Айтшы – дейсің – ертегі,

Ертегі өзің мен үшін!

– Кино көрем! – дейсің сен,

Демей папам көз ілсін.

Сен киноға сүйсінсең,

Мультфилімім өзіңсің!

Ойламайсың ештеме,

Сен ұқпайсың папаңды.

Сен – сәбисің кішкене,

Мен – сәбимін сақалды!