Өлеңдер ✍️

Мұңға оранды үмітін үзіп еркем,

Жасырады қара жер жүзін ертең.

Шыны түтік ішінен көрініп тұр –

Тәтті өмірдің түр-түсі қызыл екен.

Туған-туыс, ағайын, інім кепті,

Танығандай боп тұрмын бүгін көпті.

Сәйкеспеді қандары,

Жан жарымды

Бейтаныстар қан беріп күлімдетті.

Жарым  аман,

Нәресте –   балам да аман,

Тізе бүкті сұм ажал жалаңдаған,

Қанын беру – жан беру, өмір беру,

Құдірет-күш екен ғой Адамға Адам!

Көз тігеміз армандап жыраққа кіл,

Біз ұмтылған алдағы шырақ та бір.

Достық, мейірім арқылы жалғасатын

Бәрімізде бар бүгін бір-ақ тамыр!

Мейірім барда, ағайын, өлімді ұмыт,

Тұрсын әр кез көңілдің төрінде үміт.

Бір адамнан ауысып бір адамға,

Қып-қызыл қан – ағады өмір күліп!