Өлеңдер ✍️

  01.06.2023
  1036


Автор: Серікбай Оспанов

Біздің ауыл - құмды ауыл...

Біздің ауыл - құмды ауыл,


Толар күнде жол құмға.


Соғып өтсе бір дауыл,


Ұқсар ақ жал толқынға.


 


Қырларды жел үйіріп,


Алып келер ауылға.


Жал-жал құмдар үйіліп,


Ұқсар жүрек, бауырға.


 


Қырларға қыр мінгесіп,


Қырларды қыр жетелеп,


Жүрер мұнда құм көшіп,


Бір- біріне еркелеп.


 


Жоқ боп адам іздері,


Құмға батар тілерсек.


Бір қыр әне,- қыз белі,


Бір қыр әне,- қыз емшек.


 


Оң жағында- боталар,


Сол жағында- түйелер-


Жұмыр, жұмыр жоталар


Тауға барып сүйенер.


 


Ұқсас сары қауынға


Тауды таулар жалғайды.


Қайтқаныңша ауылға


Жел соқса ізің қалмайды.


 


Көшіп- қонған қырлары –


Сап- сары құм,


Қызыл құм.


Қорқытады құмдағы


Қалмайтыны ізіңнің...




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу