Өлеңдер ✍️

Тұр зорайып құлпытас,

Қабірдің де сырты тас.

Мүрде үстін басып тұр –

Құлпытаспен біртұтас.

Неге бәрін тас қылған,

Неге таспен бастырған?!

Өлік – тыныш.

Қабірдің

Кім шығады астынан?!

Жер бітеген тас қамал,

Көрген кісі жасқанар.

Шығып кетпей жатыр ғой

Жер жамылған басқалар...

Тірлігінде қас қылған

Қорықты ма адам-қасқырдан?

Бос мақтан ба

Байлықты

Тас қамалға шаштырған?!

Түскен кім бар аспаннан,

Сақта, Құдай, асқаннан!

Ата-бабаң

Жамылып,

Топырақты жастанған!