Өлеңдер ✍️

Үш аяқ мотоциклдiң
Көсiгiнде бала отыр,
Бесiгiнде шал отыр.
Тiзгiндегi ұлы мәз,
Шалдың шыбын жаны отыр.
Мотоцикл зулайды,
Жел құлақта шулайды.
Долы желдiң екпiнi
Шалдың көзiн сулайды.
– Өлтiремiсiң, апыр-рым,
Ақырын жүр, ақырын!
– Ақырын жүрiп келемiз,
Жылдамдық – жүз-ақ шақырым!
Бала газды басады,
Шал шошынып сасады.
Дөңгелектiң астынан
Жол зымырап қашады.
– Жындандың ба, немене,
Жай жүр, өлгiң келе ме?
Бала күлер қарқылдап,
Шал қушияр қалтылдап...
Жас кезiнде жүйрiкпен,
Қасқыр қуып шүйлiккен,
Желден озған мына атай,
Үрейлендi-ау, ұят-ай!
Жас көңiлдi тасытқан,
Қарт көңiлдi жасытқан
Жылдамдықтың қуаты-ай!..