Өлеңдер ✍️

Осы күні жүрген кім бар жетісіп?!
Бірақ, бірақ, кейбіреудің көздерінің еті өсіп,
Ауа райы құбылса да, жылы пештің жанында
Дəу мысықтай пырылдайды алғаннан соң сүт ішіп.
Күйеу-сынды қайынжұртта жеп отырған май төсін,
Тамағы тоқ, уайым жоқ жанды көрсең қайтесің?
Кейбіреулер сипағанды, қимағанды білмейді,
Бұзау-сынды еркелетіп, сипасаң да əукесін.
Жүрген болсам бастаулардың көзін ашып бітелген,
Кейбіреулер қозы-сынды емізікпен сүт емген.
Марқайса да, ұмытпас деп ашта жеген құйқасын,
Солардан да бір жақсылық күтем мен.
Абыржимын асық ойнап ұтылатын баладай,
Кейбіреулер асып-тасқан, жынын шашқан бурадай.
Кейбіреулер шұрқырасқан, кісінеген құлындай,
Көңіл алаң айдалада қаңсып жатқан қорадай.
Атқа мініп шынықтырса төл өрбіткен қойлы ауыл,
Ел назарын бұрып тұрса қыстауым мен жайлауым.
Қағып-сылкіп, тулақтай қып тоздырған кім даланы?
Еріксізден берілемін ойға ауыр.