Өлеңдер ✍️

Көкірек толған үміт, толған арман,
Жас жаным болашаққа жолдама алған.
Тілеймін нұр үстіне нұр жауғанын,
Қанағат таба алмаймын қолда бардан.
Парызға пар жегілген үмітпенен
Ентелеп ертеңіме жүріп келем.
 Сенімім: «жетем» – деген жетелейді,
Көңілден орын бермен күдікке мен.
Ер жеттім. Енді мен де ересекпін,
Нық тұрмын вахтасында келешектің.
«Халқымның қамын жеймін» – деген ойдан
Біткендей бойға қуат, ерекше екпін.
Бықсуы қоламтаның аулақ менен,
Жарқ етіп, лапыл қағып, лаулап берем.
Жалқыны жанартаудың секілденіп
Өзімнен оттай ыстық аумапты өлең.