Өлеңдер ✍️

Жылылығына бөлегенімен жазды нұр,
Тұрмайды бақыт, шаттықтан ғана аз ғұмыр.
Ызғарлы күзді қарсы алдым мен де көңілсіз,
Күрсініп терең, шығарып салып жазды бұл.
⠀
Биылғы жазым болды ғой толы сынаққа,
Анамды бізден әкетті келмес жыраққа.
Жердің бетінен індеттің жойып тамырын,
Сыйынам, қалған пендеңді, Алла, жылатпа.
⠀
Көңілге қаяу түсірген қиын, кез мұңды
Жадырап жаздың тұрмасын мәңгі сездірді.
Жақсы деп қалай айта алам ауыз толтырып
Анамнан бізді айырған қатал мезгілді!?
⠀
Құбылтып күйін, төзімін жанның тексерер,
Кезекпен мезгіл жіберген Алла - бек шебер.
Сындардан кейін берсінші сауап молынан,
Келесі жазды көруді нəсіп етсе егер.....