Ассаламу алейкум! Ыстық күні тұтқан оразаның сауабы жай күндердегі ораза сауабынан көбірек пе?

Жауап

Уа алейкум ассалам!

Ораза – пендені Алла Тағалаға жақындатушы ең абзал құлшылықтардың бірі. Хақ Тағала ризашылығы үшін бір күн ораза тұтқан адамның жүзі тозақтан жетпіс жылға алыстатылады. Бұл жайлы Әбу Сағид әл-Худри (р.а.): «Кімде-кім Алла жолында бір күн ораза тұтса, Алла Тағала оның дидарын тозақтан жетпіс жылға алыстатады[1]», – деген риуаят жеткізген.

Ал, оразаны тұту тәуліктің ұзақтығы немесе күннің ыстығына байланысты қиындай түссе, оның сауабы да көбірек болады. Айша (р.а.) анамызға Алла елшісі (с.ғ.с.) ұмра қажылығында: «Расында саған қиналғандығың және жұмсаған қаражатыңның мөлшеріндей сауап бар[2]», –деген екен.

Хадисте айтылғандай, құлшылық жасау барысында кездескен қиыншылықтар ғибадаттың сауабын еселей түседі.

[1] Бұхари
[2] Сунан Дарақұтни