Өлеңдер ✍️

Мақалдап сөйлеп,

Мақамдап

Өлеңмен берген батасын,

Ойласам бүгін

Сәл талдап,

Ақын екенсің, аташым!

Немерелерің – Үмітай,

Мұңсызхан, Мұңсыз, Гүлмейрам...

Сен көрер ме едің?!

Үміт-ай...

Біздің үйде енді кіл мейрам!

Арманым ауыр жолға сап,

Мұздатты, кейде жібітті ой.

Үміт-ай...

Үміт –  болашақ,

Өмірдің өзі үміт қой!

Өмірді  –

Сүйіп үмітті,

Мұңсыздық бақыт деп кеттің.

Ол кезде бірақ кім ұқты

Сабағын сендей мектептің?!

Үміт-ай... – деймін ойланып,

Дедің бе жұртым ойлансын?..

Шөп шауып, жүріп қой бағып,

Дәл тауып қалай қойғансың?!

Өзіңнен сәби жоқтығы-ау,

Жас шағымда біліп пе ем?!

Өмірден мынау өттің-ау,

«Үміт-ай» деумен, үмітпен...