Өлеңдер ✍️

Не нужен мне берег турецкий...

 (М. Исаковский)

Талай жыл өтпесе де текке мүлде,

Алысқа сапар шеккім кеп менің де,

Жерорта теңізіне келіп тұрмын,

Жер ортасы жасына жеткенімде.

Ақ теңіз*, болмаса да төріңде еншім,

Түркінің тағдырындай көрінгенсің.

Бағзыда Каспийменен, Аралменен,

Ортақ бір ұлы судан** бөлінгенсің.

Естісем түрік қыздың гөзәл үнін,

Өзгермей бабалардың сөзі әлі жүр.

Кеткендер мың жыл бұрын Сыр бойынан,

Жүргізді жарты әлемге өз әмірін. 

Таусылмас тарихың бар көне дастан,

Жүз мыңдап тереңіңе кеме батқан.

Қайықты Шелли^*** мінген дауыл бұзып,

Жағада өлең аңқып дене жатқан.

Күмістей балығыңды шолпытасың,

Тұңғиық тереңіңмен қорқытасың.

Толқыма, жер ортасы, сен толқысаң,

Дүбірлі дүниені толқытасың. 

Бір-бірін туыс ұлттың бағалауы,

Бауыр деп, керек екен ағалауы.

Тұранның кіндігінде біз жүрсек те,

Түріктің керек екен жағалауы.

* Жерорта теңізін түріктер Ақ теңіз деп атайды

**Мезозой дәуіріндегі Тетис мұхиты

*** Жерорта теңізінде қаза болған ағылшын ақыны