Өлеңдер ✍️

Өмірге ақым төленбеді ме?
Жауап береді кімдер?
Жазылған барлық өлеңдеріме,
Жауап береді күндер.

Қайғыға ұқсас әзілдеріме,
Жауап бере ме бақыт?
Жүрекке түскен әжімдеріме,
Жауап береді уақыт.

Соңынан оның сенделгеніме,
Жауап бере ме сезім?
Осыған дейін көргендеріме,
Жауап береді көзім.

Ең асыл сәтті тонатқаныма,
Жауап беретін кім бар?
Тапқандарыма, жоғалтқаныма,
Жауап бере ме жылдар?

Әлемді бөлек қабылдауыма,
Жауапты бөлек қалдыр.
Келешек жақтан табылғаныма,
Жауап береді тағдыр.

Өлең деп білдім берген ғұмырды,
Бесік пен көрге дейін.
Өмірге неге келгендігімді,
Айтамын өзім кейін...