Өлеңдер ✍️

(Қ. Алтынбаевқа)
Ақанның сайысатын құласымен,
Тұлпардың тұқымы едің құлашы кең.
Алпыстан астым-ау, деп абыржыма,
Құдайдың қозғалмайтын құдасы ма ең?!
Қас түгіл, арыныңа достар сенбей,
Бұлқындың Бұқтырмадан босқан селдей.
Қазақта арғы-бергі болған емес,
Жырына Абай жұртын қосқан сендей.
Дәметсем қазынасы – толған жерден, Өзіңдей
өлең керек орман-бермен.
Тұп-тұтас атақсың ғой өз алдыңа,
Атақты қайтушы едің қолдан берген?!
Қалбаның қайыспайтын тірегісің,
Атақ бер Байбураңа мінезі үшін!
Біздегі атақтылар ішіндегі,
Атақты екеніңді біледі ішім...

1984 жыл