Өлеңдер ✍️

Есiлдiң ерке сұлуы, Есiмнен кетпес наздарың.
Жаныңның жарқын жылуы, – Жырлайды жастық саздарын.
Арбаған ойды сен ғана, Айдында жүзген аққудай;
Куә боп бiзге кең дала, Тербелген қырда ақ бидай.
Сыр айтып сырбаз ақ қайың, Ой салар қайсар қарағай;
Достардай бiзге жақ дайым, Пейiлi дарқан даладай.
Ойнаған нулы өңiрде, Лағындай ерке киiктiң;
Сағыныш толып көңiлге, Шықпайсың естен, сүйiктiм.
 Астана қолын бұлғайды, Ертеңге нұрлы асыққан;
Махаббат әнiн тыңдайды, Өмiрге iңкәр ғашықтан.
Шарқ ұрып шыңға шығайық, Шалқытып ән мен жыр кешiн;
Астана өссiн нығайып, Елдiктiң шыңдап iргесiн!