Өлеңдер ✍️

Аққулар билегенде:
Күлімдеп Күн жанары,
Дүние нұрланады.
Сыңғырлап сырғалары
Ақ қайың ырғалады.
Аққулар билегенде:
Ақ маржан шашылады,
Əппақ гүл ашылады.
Құрақтар майысады,
Бұлақтар асығады.
Аққулар билегенде;
Мамырлап таң самалы,
Тамырда қан соғады.
Айлы түн аясында
Ғашықтар əн салады.
Аққулар билегенде:
Жадырап жас та кəрі,
Жан біткен мас болады.
Елжіреп ет-жүрегің,
Жанардан жас тамады…
Аққулар билегенде:
Адыра қалып қайғы,
Аналар қамықпайды.
Аяулы бесігінде
Албырап бала ұйқтайды.
Аққулар билегенде:
Əн жаулап жан-денені,
Сұлулар сəнденеді.
Алқынып, алабұртып
Аңсайсың əлденені…
Аққулар билегенде:
Айдынға Ай қонады.
Тамаша той болады.
Жер үсті бірер сəтке
Жұмаққа айналады!