Өлеңдер ✍️

Өмір – өзен, арнасы көп толысқан,  

Өмір – өзен, сан тағдырлар тоғысқан.

Өмір – өзен, өтіп жатқан білінбей,

Толқындары бір – бірімен жарысқан.

Өмір – ғажап, атқан арай таңдарың.

Өмір – ғажап, асқақ сезім – арманың.

Өмір деген тірлік кешу – әр күнің.

Бірде құлап, бірде биік самғауың.

Өмір деген – қуанышты сәттерің,

Баға жетпес балалығың шақ керім.

Еңбектеніп, адал терін төккенің,

Өмір деген мақсатыңа жеткенің.

Өмір – ғажап, бір – біріңе қонақсың,

Зымырап бір өте шығар шолақ тым.

Өмір деген ағып түскен жұлдыздай,

Жаратқаннан жарлық келсе – бірақ күн!

Өмір деген – жақыныңды сағыну,

Мұңайғанның дәл қасынан табылу.

Өмір, кейде тәкаппарсың, қаталсың,

Өмір деген – сынағына бағыну.

Өмір – төзу, қалмай алға ілесу,

Өмір – айқас, арпалысу, күресу.

Өмір деген – алай – дүлей бұрқасын,

Дауылына қарсы тұрып, тіресу.

Қос жүректің сезімінен тұратын,

Өмір деген – махаббатқа ұласу.

Өмір деген – таңды таңға атырып,

Адал досқа ақтарып бір сыр ашу.

Өмір – ғажап, жеміс дәнін сепкенің,   2- рет

Өмір деген – сырға толы көктемің.

Теңдесі жоқ құдіретті сыйлығың.

Өмір деген – бұйырған бақ көктегің!

Өмір ғажап – бар ғұмырың, өткенің...

Сөзі Айтбек Рымбекұлы Әліпов,

5 сәуір 2024 ж., Астана қ.