Өлеңдер ✍️

Үміт – үлкен ағайым,

Ізет атты інім бар.

Мейірім де ағайын,

Хабарласып тұрыңдар.

Көңілім көл кімге де,

Сүйенішім көп менің.

Жақынмын мен Гүлге де,

Анашымдай көкте Күн.

Кіші ағайым – Кісілік,

Күлкі деген жиенім.

Жақын досым – Түсінік,

Әзілді де сүйемін.

Көлгірсуді көп білмен,

Артық айтсам ел кешсін.

Айда туған жоқпын мен,

Жерде тусаң жерлессің!

Бәріміз бір жаралдық,

Жақсылық, Ар – жақыным.

Жолдас Арман, Адалдық,

Әкем менің – Ақылым!

Жолдастыққа жараған,

Ұстар ту ғып шындықты,

Туысқаным – бар адам,

Туысқаным – кіл мықты!