Өлеңдер ✍️

Шуақты шақ шашып нұрын, күлімдеп,
Наурыз тойы жатыр өтіп дүрілдеп.
Халқымыздың танып озық дәстүрін,
Шаттанамыз жүрегіміз дірілдеп.
Шаттанамыз кең көшеде көсіліп,
Мақтанамыз мерейленіп, тасынып.
Кәрі жартас жібігендй тұр балқып
Асау теңіз арнасына бас ұрып!
Жаға-жайлау, өмір -өлең, өрт-жаның,
Беу, азамат, халқың барда қорықпағын.
Көтереді қайда жүрсең сол халық

Жүрегіңде сезінсе сәл от барын!
Лаула, лаула! Болмайды енді тірілмей,
Келешекке көз тігелік түңілмей.
Сүйеу болып бірімізге біріміз,
Арамыздан ала мысық жүгірмей.
Нұр-шапағын тұрса шашып жарық күн,
Маздамайды ел, жер үшін жанып кім?!
Туған дала тынысы үшін, ағайын,
Мұрасына үңілейік халықтың!