Өлеңдер ✍️

Жапырақтар жиі құлап,

Бұлдырайды боз қырау бұйығы бақ.

Көңіл шемен көріксіз көшелердей,

Жылынуы жанымның қиынырақ.

Сары жапырақ сағыныш төгілді ерен,

Әурелендім етем деп өмірді өлең.

Қазы қайтып өлкемнің қаңқылдаған,

Жабырқады-ау, тағы да көңіл дөнен.

Туған жердің ой-қыры таныс маңы,

Жасыл көркің жадымнан алыстады.

Жазы көшкен жапырақ жүрегімді,

Шой табанмен дүлей күз жаныштады.

Өмірім-ау, ардағым жазым еркем,

Сары сағыныш жайлайды сазыңа ерсем.

Тамылжытып бұлбұлдың таңдайында ән,

Тамаша күн шіркін-ай, тағы келсең.